Señora

Non sabemos exactamente cando sucede.

Quizais o día no que empezas a levar un pano no bolso "por se acaso". Cando baixas a música do coche para aparcar. Cando unha noite de sofá che parece un planazo. Ou cando ves alguén en xaneiro cos nocellos ao aire e pensas: ese vai coller frío.

Sexa como sexa, chega un momento no que a evidencia é incontestable:

SEÑORA.

E mira, estupendamente.

Porque ser unha señora tamén significa chegar a ese marabilloso momento da vida no que empezas a ter bastante claro que che gusta, que non e para que cousas xa non estás disposta a perder o tempo.

Esta chapa non pretende rexuvenecer a ninguén. Todo o contrario. Reivindica o pracer de entrar orgullosamente na categoría señora, coas túas teimas, as túas plantas, os teus "por se acaso" e o dereito inalienable a comentar que nese sitio teñen a música demasiado alta.

Señora eu?

Si.

E a moita honra.